Democracy

Durbhagya vash 65 varsh ki azaadi ke baad bhi humein sahi manon mein DEMOCRACY nahi mill payi hai.
Chakradharr kehte hain," Jahaan janta ki, janta dwara, janta ke liye aisee taisee hoti hai wahi democracy hoti hai." Main apne toote phoote shabdon mein yun kehta hun:



Swatantra huye din beet gaye,
Par DEMOCRACY ek mithya hai,
Is desh ke bhaiyya roop hain do,
Ek Bharat hai, ek India hai.


Yahaan kewal roti aur paani,
Wahaan cake aur murga biryani,
Har shai ka hai aabhav yahaan
Aur sab kuch hai bebhaav vahaan.
Yahaan paida kar kar marr jaate,
Wahaan paida kar ke tarr jaate,


Haan chain se aati neend yahaan,
Wahaan dunlap hai lekin chain kahaan?
Is desh ke bhaiyya roop hain do,
Ek Bharat hai, ek India hai.

Azaadi ka arth

Mitron, desh ki vartamaan paristhithiyon se khinn ho kar bojhil mann se main in chaar panktiyon dwaara maujooda parevesh mein azaadi ka arth pesh kar raha hoon.


Hum azaad hain khoon bahaane ke liye,
Hum azaad hain loot ke khaane ke liye,
Isi ko toh kehte hai POORN SWARAJ,
Poora desh apna hai aag lagaane ke liye.